DAMDAMIN AY ISARA

Crisanta N. Cardeño-Reyes

Setyembre 15, 2017

I

Maraming dahilan ang nangangatwiran,

Dahil ang katotohanan ay ayaw pakinggan.

Ang bakit ay walang kasagutan,

Paniniwala ay nasa sariling basehan.

II

Yaring puso at isipan kahit na ingatan.

Nasasaktan at naiiwang luhaan.

Ang damdamin ay hinubog na bulaan,

Upang makapagtago sa katotohanan.

III

Maraming mali ang matutuklasan,

Kung ang diwa ay pakikinggan.

Ang bawat sala ay maiiwasan,

Kung ang lahat ay magkakaunawaan.

IV

Ituro ang ngiti sa bawat damdamin,

Isipan ay hayaan na ang lahat ay tuklasin.

Ipaubaya ang luha sa hangin,

Natutuyo ang lungkot kung hahawiin.

V

Asahan mo ang isang pag-asa,

Bagamat wala kang nakikita.

Ang tagumpay ay makukuha,

Pagsikapan mo kahit na may dusa.

VI

Kung ikaw ay walang kilala,

Maiiwan ka sa mundo na nag-iisa.

Damdamin mo ay isara sa iba,

Upang ang mali sa iyo ay hindi na makita.