DAMHIN

Crisanta N. Cardeño-Reyes

1992

I

Sadyang nakakaakit yaring pag-ibig,

Wari bang sa puso ay may isang himig.

Nakakaaliw damhin ang bawat pintig,

Subalit kung minsan nakaliligalig.

II

Kinikilig itong pusong nagmamahal,

Lahat ay tama ang mali ay hindi bawal.

Damdaming kay ganda ay kinararangal,

At itinatayo ang sariling dangal.

III

Pag-ibig sa puso ay kay sarap damhin,

At itong diwa ay kaya niyang gisingin.

Kay sarap ng ikaw ay pagkamahalin,

Ligaya ay higit sa iisang damdamin.

IV

Nakakabaliw ang ikaw ay magmahal,

At tunay ngang ito ay nakakahangal.

Sa pag-iibigan ay walang sagabal,

Kung nagkakaisa mga pusong marangal.

V

Kapayapaan ay iyong makikita,

Kung tunay na pag-ibig ang nadarama.

Damhin ang pusong tunay na sumisinta,

Ang ligaya ay kay sarap kasama.

VI

Nasa puso ay damdaming dapat damhin,

Upang sa tuwina ikaw ay kiligin.

Ang hilahil ay huwag problemahin,

Puso ay turuan na ang lahat ay unawain.