HINDI KO IPAGKAKAIT

Crisanta N. Cardeño-Reyes

1991

I

Bagamat sa puso ay masakit,

Pagsintang sa akin ay ipinagkait.

Pangako ko pa rin itong langit,

Kahit ako ay iyong hinagupit.

II

Handa na ako sa magaganap,

Haharapin ko ang ano mang hirap.

Kahit na ako ay hindi mo ilingap,

Pag-ibig ko ay iyong matatanggap.

III

Pagmamahal ko sa iyo ay wagas,

Sa mga pasakit ay laging may lunas.

Lahat ng bagay ay lilipas at maaagnas,

Pag-ibig ko sa iyo ay walang wakas.

IV

Pag-ibig ko ay hindi ipagkakait,

Pagsinta kong sa iyo ay sakdal langit.

Kahit na puso ko ay ihagupit,

Pag-ibig ko ay nakakahigit.

V

Durugin man itong aking puso,

Pag-ibig ko ay hindi maitatago.

Ang aking pag-ibig ay hindi lalayo,

Maninindigan kahit na bigo.

VI

Hindi ko ipagkakait ang pag-ibig,

Sapagkat ikaw ang aking daigdig.

Kahit na ang mundo ay maligalig,

Ang nagmamahal ay hindi padadaig.