HINTO

Crisanta N. Cardeño-Reyes

Hunyo 10, 2008

I

Kaibigan hinto,

Panandalian kang tumigil at huwag kumibo.

Huminga ng malalim, pakingggan ang puso,

Ang mata ay ipikit ang ulo mo ay iyuko.

II

Ganyan nga kaibigan,

Kung minsan pagpapahinga ay kailangan.

Damhin ang hindi pa nararanasan,

Ilutang ang sarili sa mundong kinagagalawan.

III

Mahirap talagang kamtin ang kapayapaan,

Isaayos man ang lahat ito ay walang katiyakan.

Walang bagay na maaari mong panghawakan,

Maging ang sandali ay walang kasiguruhan.

IV

Kaya ang aking payo, ikaw ay maki-agos,

Sa takbo nitong buhay lahat ay makakaraos.

Walang suliranin na hindi natatapos,

Sapagkat ang bawat oras ay umaagos.

V

Ang labi mo ay hayaang ngumiti,

Tawanan mo ang lungkot kahit na sandali.

Sapagkat ang saya, kapag iyong minithi,

Lahat ng kabiguan ay mahahawi.

VI

Kaibigan, ikaw ay magpakasaya,

Sarili ay hayaan mong sa mundo ay lumigaya.

Kung meron man hilahil na iyong nadarama,

Ihinto ang pag-iisip at Diyos ang magpapasya.