IKAW PA RIN

Crisanta N. Cardeño-Reyes

Marso 1991

I

Ipagpatawad mo ang aking kahinaan,

Na harapin ang tunay na katotohanan.

Katotohanang aking nararamdaman,

Ito ay ang pagsintang sa iyo nakalaan.

II

Mahal ka pa rin nitong aking puso,

Kahit umalis ako at pumunta sa malayo.

Kung ang pagmamahal ko'y 'di mo napagtanto,

Patawarin ako sa mali kong pagsuyo.

III

Ngayon ko natuklasan ang katotohanan,

Na ang pag-ibig ay hindi maaaring takasan.

Tatanggapin kita sa munting dahilan,

Pag-ibig pa rin ang aking nararamdaman.

IV

Sana ay ikaw na ang aking makapiling,

Sa bawat araw at taon pang darating.

Pag-ibig mo nawa ay sa akin ibaling,

Ito lamang ang tangi kong hinihiling.

V

Ikaw at ikaw pa rin ang tangi kong mamahalin,

Ang lahat sa buhay mo ay handa kong yapusin.

Pagkukulang sa isa't isa ay aking uunawain,

Upang hindi na magkahiwalay ating damdamin.

VI

Kung sakali man ang tadhana ay magbiro,

Paglayuin ang nagmamahalan nating puso.

Iyong tatandaan, pag-ibig ko ay hindi lalayo,

Sa iyo ko ito ilalaan kahit ako ay malayo.