MANANATILI

Crisanta N. Cardeño-Reyes

2005

I

Sino ang may sabing ako ay bigo?

Kahit na tayo ay nagkalayo.

Tagumpay pa rin yaring aking puso,

Sapagkat minsan tayo ay nagkatagpo.

II

Ikaw ay hindi nawaglit sa aking isipan,

Patuloy kong binabalikan yaring nakaraan.

Nakaukit sa puso ang pag-ibig kong inilaan,

Na mananatiling sa iyo magpakailanman.

III

Kung hindi man tayo muling magtagpo,

At ang landas natin ay tuluyan ng nagkalayo.

Dito sa puso ko ay patuloy kong itatago,

Ang pagmamahal kong hindi mo napagtanto.

IV

Pagpapaalam ay hindi mangyayari kailanman,

Hihintayin ko panahon na nakalaan.

Ang makasama ka kahit panandalian,

At muling manumbalik, tamis ng pagtitinginan.

V

Unang pag-ibig ay kay sarap alalahanin,

At kahit kailan ay hindi ko ito lilimutin.

Kahit na masakit ang pinadama sa damdamin,

Ikaw pa rin ang mananatili kong mamahalin.

VI

Asahan mong puso ko ay hindi magbabago,

Damdamin ko sa iyo ay hindi maglalaho.

Sa puso at isipan ko ikaw ay hindi napalayo,

Sapagkat sa alaala ko ay lagi kitang kasuyo.