NAIS KITANG HAPLUSIN

Crisanta N. Cardeño-Reyes

Oktubre 20, 1998

I

Ikaw ay nais kong haplusin,

Ipadama yaring damdamin.

Mahalin ka ay aking mithiin,

Sapagkat ikaw ay aking bituin.

II

Ikaw ay nais kong makita,

Ngunit takot akong tingnan ka.

Tinig mo ay hinangad ko sa tuwina,

Pero ayaw kong marinig ka.

III

Nahihiya ako na ikaw ay kausapin,

Baka ako ay hindi mo dinggin.

Kaya itinago ko itong damdamin,

Na hindi ko kayang banggitin.

IV

Haplusin ka ay hindi ko magawa,

May takot na hindi maunawa.

Nasa puso ko ay waring sumpa,

Nang karanasang natamasa.

V

Hindi ko man naipadama,

Ang pag-ibig kong hindi naipakita.

Bibitbitin ng puso yaring pagsinta,

At itatangi ko yaring alaala.

VI

Pinaubaya ko sa panahon,

Ang damdamin ay aking ibinaon.

Sa alaala ay ililingon,

Pagsintang hindi makaahon.