PUSO AY HINDI NAKAKALIMOT

Crisanta N. Cardeño-Reyes

1994

I

Ligaya at dusa ay lubhang masalimuot,

Kaya marahil ikaw ay nakalimot.

Mga pangyayaring sadyang nakakabagot,

Sumira sa damdaming hindi mahuhugot.

II

Sa isang panahon nitong aking buhay,

Ikaw ay minahal ng walang kapantay.

Iniwan mo ako na sa iyo ay naghintay,

At nilisan mo ako ng walang salaysay.

III

Walang alaalang iyong binalikan,

Maging sa isipan mo ako ay kinalimutan.

Ang tamis nitong ating pagmamahalan,

Luha ang pinadama at ako'y iyong tinalikdan.

IV

Ang puso kong ito ay hindi nakakalimot,

Kahit kasawian ang sa puso ko ay idinulot.

Pag-ibig ko sa iyo, sa puso ko ay gagamot,

Pighating dulot mo sa akin ay hindi salot.

V

Hindi ko binibilang ang takbo ng araw,

Pagmamahal ko sa iyo ay hindi magagalaw.

Kahit panahon ang sa dibdib ko ay humataw,

Sa ating alaala, sarili ko ay hindi ibibitaw.

VI

Kung sakali man ako ay iyong balikan,

Makakaasa kang hindi kita tatalikuran.

Sapagkat hindi ko nilimot itong pagmamahalan,

Na aking itinangi at sa iyo lang inilaan.